Addis Ababa (Dawan) — Cilmi-baaris cusub oo lagu sameeyay tayada hawada Addis Ababa ayaa sheegtay in caasimadda Itoobiya ay diiwaangelisay heer kaarboon madow oo ka sarreeya magaalooyinka Milan ee Talyaaniga iyo Barcelona ee Spain, kuwaas oo ka mid ahaa magaalooyinkii Yurub ee lagu daray isbarbardhigga caalamiga ah.
Addis Ababa ayaa guud ahaan kaalinta shanaad ka gashay 34 goobood oo la qiimeeyay marka loo eego heerka kaarboonka madow ee hawada ku jira.
Kaarboonka madow waa qayb ka mid ah wasakhowga hawada oo inta badan ka dhalata gubista shidaalka, sida naaftada iyo shidaallada kale ee loo isticmaalo gaadiidka iyo matoorada. Daraasaddu waxay sheegtay in 94 % kaarboonka madow ee Addis Ababa laga cabbiray lala xiriiriyay gubista shidaalka, halka lix boqolkiiba lagu xiriiriyay gubista qoryaha iyo walxaha kale ee dabiiciga ah.
Cilmi-baaristu waxay socotay muddo saddex sano ah, laga bilaabo Abriil 2022 ilaa Maarso 2025, iyadoo qalabka cabbira tayada hawada lagu rakibay 10 goobood oo kala duwan oo Addis Ababa ah.
Celceliska walxaha aadka u yaryar ee hawada wasakheeya, ee loo yaqaan PM2.5, ayaa dhammaan goobaha gaaray qiyaastii 30 microgram halkii mitir kuyuubik oo hawo ah.
Natiijooyinka ayaa sidoo kale muujiyay in heerka maalinlaha ah ee walxahan yaryar uu ka sarreeyay xadka Hay’adda Caafimaadka Adduunka ee 15 microgram halkii mitir kuyuubik ku dhowaad 99 % maalmihii daraasaddu socotay. Celcelisyada sannadlaha ahna waxay goob kasta ugu yaraan afar jeer ka sarreeyeen heerka ay hay’addu ku taliso.