Soomaaliya, 22 Oktoobar 2025 — Madaxweynaha Somaliland Cabdiraxmaan Maxamed Cabdillaahi “Irro” ayaa ku ammaanay maamulka Puntland doorkiisa dhiirrigelinta iyo taageerada uu ku leeyahay geeddi-socodka nabadda iyo dib-u-heshiisiinta ee ka socda gobolka Sanaag.
Isagoo maanta ka hadlayay munaasabad lagu qabtay magaalada Ceerigaabo, Madaxweynaha Somaliland ayaa qiray taageerada Puntland ku bixisay dadaallada lagu soo celinayo xasilloonida gobolka Sanaag, oo sanadihii u dambeeyay la daalaa dhacayay colaado beeleed soo noqnoqday.
“Madaxweynaha Puntland Saaxiibkay Siciid Cabdullaahi Deni iyo maamulka Puntland waxaan uga mahadnaqayaa dhiirrigelintooda iyo doorkooda ay ka qaateen dadaallada nabadda ee gobolka Sanaag, gaar ahaan shirka aan maanta u fadhinno ,” ayuu yiri Madaxweyne Cirro.
Sida ay sheegeen falanqeeyayaal, hadalka Cirro wuxuu muujinayaa aqoonsi dhif ah oo ku saabsan in kaalin togan Puntland ku leedahay xasilloonida gobolka — hadal muujinaya fariin cusub oo siyaasadeed oo ka duwan codadka xasaasiga ah ee inta badan ka dhasha muranka dhuleed ee muddada dheer ka taagnaa gobolka Sanaag.