Cirro oo magaalada Davos kula kulmay Madaxweynaha Israel

Switzerland, 22 Janaayo 2026 (Dawan) — Madaxweynaha Israel, Isaac Herzog, iyo Madaxweynaha Somaliland, Cabdiraxmaan Maxamed Cabdullahi Cirro, ayaa habeenimadii Arbacada kulan casho-sharaf ah ku yeeshay magaalada Davos, sida uu Cirro ku sheegay qoraaal uu soo dhigay bartiisa Facebook.

Kulankan, oo ka dhacay meel ka baxsan shirka Dhaqaalaha Adduunka (WEF), ayaa diiradda lagu saaray "xoojinta iyo horumarinta xiriirka" u dhexeeya Israel iyo Somaliland, sida lagu sheegay bayaan kasoo baxay xafiiska Madaxweynaha Cirro.

Madaxweyne Cirro ayaa qoraal uu ku soo dhigay bartiisa Facebook ku sheegay in cashada ka soo qayb-galeen "siyaasiyiin culus iyo hoggaamiyeyaal caalami ah," wuxuuna si gaar ah u xusay Eric Trump, oo ah wiilka Madaxweynaha Maraykanka Donald Trump.

Madaxweyne Herzog ayaa dhankiisa ka hadaly kulanka, isaga oo rajo ka muujiyay in iskaashiga labada dhinac uu sii xoogeysto, wuxuuna barahiisa bulshada soo dhigay sawirro muujinay kulanka, isaga oo raaciyay qoraalkan; "Waxaan soo dhoweynayaa dhisidda xiriirka diblomaasiyadeed ee u dhexeeya labada qaran, waxaanan rajaynayaa inuu soo xoogeysto iskaashiga laba-geesoodka ah ee faa’iidada u leh labadayada shacab."

Kulankan ayaa daba-socda go’aankii Israel ay dabayaaqadii sannadkii 2025 ku aqoonsatay madax-bannaanida Somaliland.

Somaliland, oo ku dhawaaqday inay tahay dal ka madax-bannaan Soomaaliya inteeda kale kadib burbrurkii dowladdii dhexe ayaa muddo dheer raadinaysay aqoonsi caalami ah. Dhisidda xiriir rasmi ah oo ay la yeelato Israel ayaa loo arkaa tallaabo muhiim ah oo ay ku xoojinayso ka-qaybgalkeeda caalamiga ah.