Muqdisho (Dawan) – Ra’iisul Wasaarihii hore ee Soomaaliya, Cumar Cabdirashiid Cali Sharmaarke, ayaa sheegay in dastuurka cusub ee Soomaaliya uu yahay dukumiinti sharci ah, balse aanu weli noqon heshiis qaran oo loo dhan yahay, isagoo ku baaqay in la gaaro is-afgarad siyaasadeed oo ballaaran.
Wareysi uu siiyay barnaamijka Miizaan Podcast ee Dawan Media, Sharmaarke ayaa sheegay in dastuurku aanu ahayn oo keliya dukumiinti sharci, balse uu sidoo kale yahay heshiis siyaasadeed oo u baahan taageero iyo aqbalad ay wadaagaan dhammaan dhinacyada siyaasadda.
“Dastuur waa heshiis siyaasadeed. Waxa hadda la hirgeliyay waa qoraal (dukumiinti), ee ma aha heshiis,” ayuu yiri Sharmaarke.
Ra’iisul Wasaarihii hore ayaa sheegay inuu arko horumar laga sameeyay qaybo ka mid ah dastuurka cusub, isagoo xusay in qodobo badan ay ka wanaagsan yihiin kuwii hore. Hase yeeshee, wuxuu sheegay in habkii loo maray ansixintiisa iyo wada-tashiyada kooban ay keeneen in siyaasiyiin iyo dowlad-goboleedyo ka tirsan dowladda federaalka ay su’aalo ka keenaan ama diidaan.
Sharmaarke ayaa ku adkeystay in dastuurka Soomaaliya uu noqon karo mid qaran oo rasmi ah marka ay aqbalaan shacabka Soomaaliyeed, hoggaamiyeyaasha siyaasadda iyo dhammaan dowlad-goboleedyada xubnaha ka ah dowladda federaalka.
