Jigjiga (Dawan) – Xarunta Saadaasha Hawada ee Dowlad Deegaanka Soomaalida iyo deegaannada dariska ah ayaa ka digtay roobab xooggan oo ka badan xaddigii caadiga ahaa, kuwaas oo la filayo inay maalmaha soo socda ka da’aan qaybo badan oo ka mid ah deegaanka.
Digniintan ayaa ku soo beegmaysa xilli la galay bilowga roobabka Gu’ga, iyadoo bulshada ku nool deegaanka ay u diyaar garoobayaan falashada beeraha iyo ka faa’iidaysiga roobabka xilliyeedka.
Sida ay sheegtay xarunta saadaasha hawadu, roobab xooggan ayaa laga filayaa magaalada Jigjiga iyo nawaaxigeeda, kuwaas oo xaddigoodu u dhexeeyo 50 ilaa 75 milimitir. Degmooyinka Xarshin iyo Qabribayax ee gobolka Faafan ayaa sidoo kale la saadaalinayaa inay ka da’aan roobab u dhexeeya 75 ilaa 100 milimitir, kuwaas oo ah heerarka ugu sarreeya ee cabbirka roobabka.
Gobollada Qoraxay iyo Doollo ayaa iyaguna ka mid ah meelaha la filayo inay helaan roobab ka badan xaddigii caadiga ahaa, taas oo kordhin karta halista daadad degdeg ah iyo fatahaado.
