Bakool (Dawan)— Dagaallame u dhashay Itoobiya oo muddo ka badan afar sano ka tirsanaa kooxda Al-Shabaab ayaa isku soo dhiibay ciidamada deegaanka Quracjoome ee gobolka Bakool, sida ay sheegtay Wasaaradda Gaashaandhigga Soomaaliya caawa oo Talaado ah.
Wasaaraddu waxay sheegtay in uu ka mid ahaa dagaallamayaasha ajnabiga ah ee kooxda Al-Shabaab.
Ninkan oo magaciisa ku sheegay Mufti ayaa sheegay in markii uu Soomaaliya soo galay loo bixiyay magaca Cumar, wuxuuna muddo afar sano iyo bil ah ka tirsanaa Al-Shabaab, sida lagu sheegay war kasoo baxay Wasaaradda Gaashaandhigga.
Wasaaraddu waxay sheegtay in dagaallamuhu uu ka soo noqday fikirkii iyo hawlihii kooxda, isagoo sheegay inuu fahmay in kooxda ay ku shaqeyso marin-habaabinta iyo been-abuurka diinta Islaamka.
