Muqdisho (Dawan) — Dakhliga gudaha ee Dowladda Federaalka Soomaaliya ay ururisay sannadkii 2025 ayaa daboolay dhammaan mushaharka joogtada ah ee shaqaalaha dowladda, iyadoo sidoo kale lagu maalgeliyey qayb weyn oo ka mid ah kharashaadka joogtada ah ee hay’adaha dowladda.
Warbixinta sannadlaha ah iyo xisaab-xirka Dowladda Federaalka Soomaaliya ee sannadkii 2025, oo uu soo saaray Xafiiska Xisaabiyaha Guud ee Soomaaliya, ayaa muujisay in dakhliga gudaha uu gaaray $404.3 milyan, halka sannadkii 2024 uu ahaa $369.3 milyan.
Tani waxay ka dhigan tahay in dakhliga gudaha uu kordhay ku dhowaad $35 milyan, ama 9.4%, marka loo eego sannadkii ka horreeyey.
Dakhliga gudaha ayaa dowladda u suurtageliyey inay daboosho dhammaan mushaharka joogtada ah ee shaqaalaha dowladda, kaas oo gaaray qiyaastii $366.4 milyan.
Sidaas darteed, dakhliga gudaha ayaa mushaharka shaqaalaha ka sarreeyey ku dhowaad $38 milyan. Warbixintu waxay sidoo kale muujisay in sannadihii 2022 ilaa 2024 dakhliga gudaha uu daboolay 100% mushaharka shaqaalaha dowladda.
Amniga oo helay qaybta ugu weyn ee kharashaadka joogtada ah
Xisaab-xirka dowladda ayaa muujinaya in hay’adaha amniga lagu bixiyey $266 milyan, taas oo u dhiganta 43% kharashaadka joogtada ah ee la bixiyey sannadka 2025.
Hay’adaha dhaqaalaha iyo bulshada ayaa lagu bixiyey $84 milyan, oo u dhiganta 13% kharashaadka joogtada ah.
Si kastaba ha ahaatee, dakhliga gudaha keligiis ma daboolin dhammaan kharashaadka joogtada ah ee dowladda, balse wuxuu noqday isha ugu weyn ee lagu daboolay mushaharka shaqaalaha iyo qayb muhiim ah oo ka mid ah hawlaha dowladda.
Mashaariicda horumarinta oo la helay wax ka yar intii la qorsheeyey
Dhinaca mashaariicda horumarinta, dowladda ma aysan helin dhammaan lacagihii la qorsheeyey.
Dowladdu waxay sannadka 2025 mashaariicda horumarinta u qorsheysay ku dhowaad $710.1 milyan, balse lacagta dhab ahaan lagu bixiyey waxay noqotay qiyaastii $350 milyan.
Taas ayaa ka dhigan in la fuliyey 49% miisaaniyaddii loo qorsheeyey mashaariicda horumarinta.
