Dalxiiska badda oo noqday himilada cusub ee Kenya

Kenya, Maarso 22, 2026 (Dawan) – Dalka Kenya ayaa si istiraatiiji ah, dib u qaabeynaya qaybta dalxiiska, isaga oo ka guuraya qaabkii hore ee ku saleysnaa safarrada Safari-ga iyo duurjoogta, una weecanaya dalxiiska safarrada badda iyo dhaqaalaha buluugga ah.

Kenya waxay ku caan baxday dalxiisa savanna-da iyo duurjoogta , taasoo ka dhigtay dalxiiskeeda mid guul weyn gaaray, balse hadda waxay la timid qorshe cusub guushaas lagu sii xajinayo.

Iyada oo la amba qaadeysa isbeddelka hababka safarka ee caalamka ka socda, dowladda Madaxweyne William Ruto waxay u aragtaa dalxiiska arrin muhiim ah oo lagu horumarinayo dhaqaalaha, halkii uu ka ahaan lahaa kaliya adeeg dhaqameed.

Dekedda Mombasa ayaa marti gelisay kororka tirada maraakiibta safarka badda, iyadoo dib u habeyn lagu sameeyay waddooyinka dalxiiska caalamiga ah. Dalxiiska safarrada badda wuxuu isku xiraya kala duwanaanta juqraafi, isagoo xoojinaya tartanka Kenya ee dalxiiska adduunka.

Horumarinta dekedda safarrada badda ee Mombasa ayaa qayb muhiim ah ka ah qorshahan, iyada oo la ballaarinayo awooda martigelinta, lana hagaajinayo qaabka soo dhaweynta dalxiisayaasha, si kor loogu qaado tartanka Kenya iyo Afrika guud ahaan.

Dalxiisayaasha marka ay yimaadaan, waxay helayan khibrad isku dhafan sida booqashada degmooyinka taariikhiga ah ee Mombasa, xeebaha raaxada leh ee Diani, iyo safarrada Safari-ga ee dhow, taasoo siinaysa Kenya fursad gaar ah oo ay ku soo jiidato dalxiisayaal badan oo kala duwan muddo gaaban.

Dhaqaale ahaan, safarradani waxay xoojinayan waaxyo badan, oo ay ku jiraan shirkadaha dalxiiska, gaadiidka, farshaxanka, iyo martigelinta, waxayna abuuraysa shaqooyin iyo kororka dakhliga ee deegaanka.

Si kastaba ha ahaate, dowladda Kenya waxay ka digaysaa saamaynta xun ee dalxiisku ku yeelan karo nidaamyada deegaanka ee xeebaha iyo kala duwanaanta badda, waxayna hirgelisay siyaasado lagu ilaalinayo deegaanka, iyadoo la kaashaneysa shirkadaha safarrada badda.

Dhinaca gobolka, Kenya waxay xoojineysaa iskaashiga dalalka Badweynta Hindiya si loo horumariyo marino dalxiis oo kala duwan, taasoo ka dhigeysa Kenya barta albaabka iyo xarunta istiraatiijiga ah ee dalxiiska.

Isbeddeladan waxay muujinayaan in Kenya aysan ku tiirsaneyn oo kaliya dalxiiski hore balse ay sameyneyso qaab cusub oo isku dhafan, kaasoo isku keenaya dalxiiska dhulka iyo badda, una diyaarsan haqabtirka dalxiisayaasha caalamiga ah.