Itoobiya — 8 Oktoobar 2025 — Gobolka Soomaalida ee Itoobiya ayaa Talaadadii bilaabay Barnaamijka Diiwaangelinta Aqoonsiga Qaranka ee Fayda ee Qolooji, kaasoo siinaya aqoonsi rasmi ah in ka badan 65,000 oo qof oo barakacayaal gudaha ah (IDPs) kuwaas oo muddo dheer la kulmay caqabado ku aaddan helitaanka dukumentiyo rasmi ah.
Barnaamijkan waxaa iska kaashaday Xafiiska Maaraynta Khataraha Masiibooyinka ee Dowlad Deegaanka Soomaalida(DDS), Hay’adda Qaramada Midoobay u qaabilsan Qaxootiga (UNHCR), iyo hay’ado kale oo samafal. Munaasabadda daahfurka waxaa furay Wasiir ku-xigeenka DDS, Cabdifataax Maxamed Cabdi, waxaana ka qaybgalay masuuliyiin ka socday Xafiiska Dakhliga DDS, Waaxda Aqoonsiga Qaranka, maamulka gobolka Faafan, iyo UNHCR.
Magaalada Qolloji, oo ku taalla qiyaastii 65 kiiloomitir koonfurta Jigjiga, waxay hoy u tahay tobanaan kun oo qof oo barakacayaal ah kuwaasoo ka cararay colaado, abaaro, iyo dhibaatooyin kale. Dad badan oo halkaa ku nool ayaa horay u waayey aqoonsi rasmi ah, taasoo xaddidaysay helitaanka adeegyada dowladda, caafimaadka, iyo waxbarashada.
Barnaamijka Fayda, oo lagu dhisay Xeerka Aqoonsiga Qaranka (2023) iyo Xeerka Ilaalinta Xogta Shaqsiga (2024), wuxuu bixiyaa aqoonsi dijital ah, kaasoo loo adeegsan karo adeegyada dowladda iyo kuwa gaarka loo leeyahay, sida bangiyada, barnaamijyada daryeelka bulshada, iyo caafimaadka. Ilaa hadda, in ka badan 4.6 milyan oo qof ayaa la diiwaangeliyey guud ahaan Itoobiya, waxaana hadda barnaamijku u fidinayaa xeryaha barakacayaasha si loo hubiyo in dadkii nugul aysan ka reeban.
“Barnaamijkani wuxuu muhiimad gaar ah u leeyahay bulshada barakacayaasha Qolloji, si ay u helaan xuquuqdooda dhameystiran, ayna si buuxda uga mid noqdaan nidaamka qaranka,” ayuu yiri Wasiir ku-xigeenka Cabdifataax Maxamed.
Masuuliyiintu waxay sheegeen in barnaamijkan uu ka caawin doono qoysaska barakacayaasha helitaanka adeegyada aasaasiga ah markii ugu horreysay, isla markaana uu yahay tallaabo weyn oo Itoobiya ku horumarinayso maamul wanaagga, bixinta adeegyada, iyo ka mid noqoshada bulshada nugul.