Itoobiya ,6 December 2025 - Mareeyaha Wakaaladda Maamulka Dabagalka Cuntada ee DDS, Cabdullahi Maxamuud, ayaa sheegay in aan la oggolaan doonin in qof aan heysanin shati xirfadle caafimaad uu bulshada u adeego, isaga oo tilmaamay in shahaado kaliya aysan ku filnayn qofka ka shaqaynaya adeegyada caafimaadka.
Hadalkan ayuu mareeyuhu ka sheegay shir uu ku faahfaahinayay talaabooyinka cusub ee ay qaadayso hay’addu, isaga oo xusay in Wasaaradda Caafimaadka Dowlad Deegaanka Soomaalida ay soo saartay awaamiir dhigaya in aysan qofna adeeg caafimaad bixin karin shati la’aan, iyadoo loo qaybiyay dhammaan bahda caafimaadka warqado rasmi ah oo arrintan adkaynaya.
Mareeyaha ayaa sidoo kale caddeeyay in xarun caafimaad aan la furin karin ilaa ay ka hesho oggolaansho dhammeystiran, kadib marka la hubiyo shaqaalaha ka howlgalaya iyo qalabka xarunta ku jira. Waxa uu sheegay in tan lagu xaqiijinayo tayada adeega, badbaadada bulshada iyo ka hortagga xarumo aan sharciyeysneyn.
