Deegaanka Soomaalida oo dhammaystiray daraasadaha dahabka ee saddex degmo

Jigjiga (Dawan)— Dowolad Deegaanka Soomaalida ayaa dhammaystirtay daraasado lagu sameeyay macdanta dahabka ee degmooyinka Moyale, Hudet iyo Dheka, iyadoo la diyaariyay xog faahfaahsan oo loogu talagalay inay taageerto maalgashiga mustaqbalka ee dhinaca macdanta, sida uu sheegay Xafiiska Macdanta, Tamarta iyo Shidaalka ee deegaanka .

Daraasaduhu waxay diiradda saareen aqoonsiga iyo kala soocidda noocyada dahabka iyo diiwaangelinta goobaha laga heli karo macdanta, sida ay sheegeen mas’uuliyiintii soo bandhigay natiijooyinka daraasadda Arbacadii.

Maxamed Cali, madaxa Xafiiska Macdanta, Tamarta iyo Shidaalka ee Deegaanka Soomaalida, ayaa sheegay in daraasadaha looga golleeyahay in wax laga qabto baahida loo qabo xog juqraafiyeed oo faahfaahsan oo la siin karo maalgashadayaasha.

“Hore xafiisku uma haysan xog dhammaystiran oo noocan ah oo la siin karo maalgashadayasha,” ayuu yiri Cali, isagoo sheegay in xogta cusub ay gacan ka geysan doonto in la ogaado nooca dahabka jira, goobaha uu ku yaallo iyo baahida maalgashi.

Daraasaduhu waxay daboolayaan ku dhowaad 34 kiiloomitir oo laba jibbaaran oo ka tirsan saddexda degmo, iyadoo sidoo kale la ururiyay isku-duwayaasha juqraafiyeed ee goobaha daraasadda lagu sameeyay, ayuu Cali sheegay.

Xogta ayaa la filayaa inay maamulka deegaanka ka caawiso inuu maalgashadayaasha siin karo macluumaad ku saabsan goobaha dahabka, muddada suurtagalka ah ee laga faa’iidaysan karo iyo baaxadda maalgashiga looga baahan yahay.

Mas’uuliyiintu waxay sheegeen in daraasaduhu sidoo kale gacan ka geysan karaan qorshaynta iyo horumarinta hawlaha macdan-qodista ee deegaanka.

Natiijooyinka daraasadaha ayaa lagu soo bandhigay kulan ay ka qaybgaleen mas’uuliyiin ka tirsan Xafiiska Macdanta, Tamarta iyo Shidaalka iyo xafiisyo kale oo dowladeed.

Cali wuxuu sheegay in dhammaystirka daraasaduhu uu maamulka deegaanka u saamaxayo inuu isticmaalo xog cilmiyeed oo faahfaahsan marka uu maalgashadayaasha u soo bandhigayo kheyraadka macdanta ee deegaanka.

Deegaanka Soomaalida ayaa dadaallo ka wada sidii loo aqoonsan lahaa, loona diiwaangelin lahaa isla markaana loo horumarin lahaa kheyraadka dabiiciga ah, iyadoo daraasaddan ay qayb ka tahay dadaalladaas.