Awdal (Dawan) – Wasiirka Wasaaradda Horumarinta Xannaanada Xoolaha Somaliland, Cumar Shucayb Maxamed, ayaa shalay degmada Baki ee gobolka Awdal ka dhagax dhigay suuq cusub oo loogu talagalay iibinta hilibka iyo khudaarta, kaas oo maalgelintiisu ka timid Bangiga Horumarinta Afrika.
Suuqan ayaa la filayaa inuu wax ka beddelo xaaladda ganacsi iyo nadaafadeed ee degmada, isla markaana ganacsatada u abuuro goob casri ah oo ay ku iibgeeyaan wax-soo-saarkooda.
Mashruucu wuxuu qayb ka yahay barnaamijka BREFONS (Build Resilience for Food and Nutrition Security), oo ay maalgeliso Hay’adda Horumarinta Afrika ee hoos timaadda Bangiga Horumarinta Afrika.
Maalgelinta barnaamijkan dhinaca heshiiska waxaa loo soo mariyey Dowladda Federaalka Soomaaliya, halka Wasaaradda Xannaanada Xoolaha, Dhirta iyo Daaqa ee Federaalka ay tahay hay’adda dowladda ee fulinta guud. Save the Children International ayaa ah hay’adda hirgelinta mashruuca, iyadoo lacagaha qandaraasyadana lagu bixinayo nidaamka lacag-bixinta tooska ah ee Bangiga, halkii lacagta marka hore lagu wareejin lahaa Somaliland.
Qandaraaska mashruucan ayaa wada daboolaya dayactirka iyo horumarinta suuqyada Baki, Lughaya, Qorilugud iyo Boorama, waxaana qiimaha guud ee afarta goobood lagu sheegay $184,778.92.
