Muqdisho (Dawan)— Maamulka Dekedda Muqdisho iyo Isbitaalka Kalkaal ayaa Jimcihii kala saxiixday heshiis lagu siinayo shaqaalaha dekedda adeegyo caafimaad, iyadoo maamulka dekeddu sheegay in heshiisku qayb ka yahay dadaallada lagu horumarinayo daryeelka iyo fayo-qabka shaqaalaha. Heshiiska waxaa Muqdisho ku kala saxiixday mas’uuliyiin ka tirsan labada dhinac, sida ay sheegeen maamulka Dekedda Muqdisho iyo Isbitaalka Kalkaal.
Maareeyaha Guud ee Dekedda Muqdisho, Maxamed Cali Nuur Ameeriko, ayaa sheegay in heshiiskani yahay kii ugu horreeyay ee noociisa ah ee dekeddu la gasho hay’ad caafimaad, kaas oo si gaar ah diiradda u saaraya caafimaadka iyo daaweynta shaqaalaha. Wuxuu uga mahadceliyay maamulka Isbitaalka Kalkaal inay aqbaleen inay adeegyo caafimaad siiyaan shaqaalaha dekedda, isla markaana ay u sameeyaan qiimo-dhimis.
“Waa heshiiskii ugu horreeyay oo shaqaalaheeda daryeel ama daawayn u sameynaya,” ayuu yiri Ameeriko, isagoo xusay in shaqaalaha dekeddu ay shaqeeyaan 24-ka saac, sidaas darteedna ay u baahan yihiin taageero ka baxsan mushaharkooda. Wuxuu sheegay in daryeelka shaqaaluhu uu muhiim u yahay maamulka dekedda, maadaama Dekedda Muqdisho ay tahay deked qaran oo ka mid ah ilaha dowladda Soomaaliya ay ka hesho canshuuraha.
Agaasimaha Isbitaalka Kalkaal, Dr. Cabdixaliim Cabdullaahi , ayaa sheegay in isbitaalku ku faraxsan yahay heshiiska, isagoo uga mahadceliyay maamulka dekedda inay u doorteen inay adeeg caafimaad siiyaan shaqaalahooda. “Waxaan ku faraxsan nahay inaan la saxiixanno heshiis shaqaalaha dekedda,” ayuu yiri Saal.
