Muqdisho 18 December 2025 (Dawan)- Madaxweynaha Dowlad-goboleedka Puntland, Siciid Cabdullaahi Deni, ayaa digniin culus u diray hoggaanka Dowladda Federaalka Soomaaliya, isaga oo ka digay in khilaafka siyaasadeed ee sii xoogeysanaya uu horseedi karo kala fogaansho iyo burbur siyaasadeed, haddii aan la helin wadahadal dhab ah iyo is-maqal.
Isaga oo ka hadlayay shirka mucaaradka ee maanta ka furmay Kismaayo, Deni ayaa sheegay in hoggaanka dalka looga baahan yahay inay dhegaysatan talada waxgaradka iyo baaqyada kasoo baxaya Golaha Samatabixinta Soomaaliyeed, kuwaas oo uu ku tilmaamay fursad lagu badbaadin karo midnimada iyo mustaqbalka dalka.
“Haddii la ismaqli waayo, la is ixtiraami waayo, lana wada noolaan waayo -arrintaasi horay ayay u soo dhacday, waana la ogyahay halka ay ku dambayso—waa la kala irdhoobi doonaa,” ayuu yiri Madaxweynaha Puntland.
