Garoowe, 16 December 2025 (Dawan)- Madaxweynaha dowlad goboleedka Puntland, Siciid Cabdullaahi Deni, ayaa si rasmi ah u qiray in nidaamka garsoorka Puntland uu la daalaa-dhacayo cillado culus, isaga oo ku tilmaamay dib-u-habaynta garsoorka inay noqon doonto mudnaan sare oo la bilaabi doono bisha Janaayo 2026.
Deni ayaa hadalkan ka jeediyay xafladda xarig-jarista Taliska Guud ee Ciidanka Booliska Puntland oo ay maalgelisay Dowladda Imaaraadka Carabta, isagoo sheegay in garsoorka si weyn loo dhaliilay isla markaana aan la aqbali doonin garsoorayaal lacag ka qaata dadka iyada oo aan cadaalad lagu fulin.
“Xaqiiqo waaye in garsoorka dhaliilo badan ka jiraan,” ayuu yiri Madaxweyne Deni, isaga oo raaciyay “Arrintan waa yoolkayaga saddexaad, Ilaahay idankiis marka Janaayo la gaaro miiska ayaan saari doonnaa. Mar dambe ma dhici doonto in nin magac garsoore huwan uu makhaayad ka dhex furto bulshada dhexdeeda.”
