Garoowe (Dawan) – Madaxweynaha Puntland, Siciid Cabdullaahi Deni, ayaa sheegay in ciidamada Puntland ay dib ula wareegeen xarun ciidan oo uu sheegay inay ka tirsanayd maamulka Puntland, balse muddooyinkii dambe ku shaqeynaysay hannaan ka baxsan nidaamka mamaulka, sida uu hadalka u dhigay.
Deni ayaa uga mahadceliyay saraakiisha iyo hoggaanka ciidamada Puntland sida uu sheegay inay si habsami leh u maareeyeen howlgalka dib loogula wareegay xarunta, isagoo xusay in ciidamadu ay ilaaliyeen kala dambeynta iyo dowladnimada.
“Waxaan uga mahadcelinayaa saraakiisha iyo hoggaamiyaasha ciidanka sida habsami leh ee ay u qorsheeyeen hawlgalka iyo sida ay ugu guuleysteen inay dowladda Puntland gacanteeda ku soo celiyaan xaruntaas,” ayuu yiri Madaxweynaha Puntland.
Deni ayaa sidoo kale uga mahadceliyay shacabka Puntland taageerada ay muujiyeen ee ku aaddan ciidamada iyo go’aamada dowladda, isagoo faray ciidamada iyo saraakiisha hoggaamineysa howlgalka inay ilaaliyaan xasilloonida, daryeelaan dhaawacyada, isla markaana si wanaagsan ula dhaqmaan maxaabiista la qabtay.
