Muqdisho (Dawan)- Guuritaanka joogtada ah ee bulshooyinka reer guuraaga ah, oo ay sabab u tahay raadinta daaqa iyo biyaha, ayaa caqabad ku ah helitaanka waxbarasho joogto ah ee carruur badan oo ka tirsan bulshooyinkaas. Arrintan ayaa keentay baahida loo qabo hannaan waxbarasho oo dabacsan, kaas oo tixgelinaya hab-nololeedka iyo duruufaha gaarka ah ee reer guuraaga.
Si wax looga qabto caqabadahaas, magaalada Muqdisho waxaa ka socda shir ay soo qabanqaabisay Jaamacadda Capital ee Soomaaliya, iyadoo iskaashi la samaysay saddex jaamacadood oo ka kala socda Nigeria, Kenya iyo Namibia.
Shirka oo soconaya 3-da ilaa 5-ta Nofeembar 2026 ayaa diiradda lagu saarayaa horumarinta waxbarashada carruurta reer guuraaga ah iyo hirgelinta hannaan waxbarasho oo beddel ah oo ka hirgeli kara dalalka Afrika, si carruurta ku nool bulshooyinka guurguura ay u helaan waxbarasho tayo leh.