Muqdisho (Dawan) – Dowladda Soomaaliya ayaa maanta oo Talaado ah cambaareysay aqbalaadda danjiraha Israa’iil ee Hargeysa iyo dhagax-dhigga safaarad laga dhisayo Somaliland, iyadoo tallaabooyinkaas ku tilmaantay xadgudub ka dhan ah madax-bannaanida dalka.
Bayaanka dowladda Soomaaliya ayaa soo baxay maalmo kaddib munaasabad ka dhacday xarunta Madaxtooyada Somaliland ee Hargeysa, halkaas oo Madaxweynaha Somaliland, Cabdiraxmaan Maxamed Cabdillaahi (Cirro), uu warqadaha aqoonsiga kaga guddoomay danjiraha Israa’iil u qaabilsan Somaliland, Michael Lotem. Madaxtooyada Somaliland ayaa munaasabaddaas ku shaacisay warbaahinta.
Wasaaradda Arrimaha Dibadda iyo Iskaashiga Caalamiga ah ee Soomaaliya ayaa bayaankeeda ku sheegtay in tallaabooyinkaas la qaaday iyada oo aan oggolaansho laga helin dowladda federaalka. Waxay ku tilmaantay “xadgudub cad oo ka dhan ah madax-bannaanida, wadajirka dhuleed iyo midnimada Soomaaliya.”
“Soomaaliya waxay tallaabooyinkaas u aqoonsanaysaa kuwo aan waxba ka jirin, isla markaana aan lahayn wax saameyn sharci ah,” ayay tiri wasaaraddu.