Muqdisho (Dawan)— Muqdisho ayaa maanta martigelisay Shirka Dhallinyarada ee Cimilada Soomaaliya, oo loo yaqaan LCOY Somalia, kaas oo qayb ka ah shirarka dhallinyarada ee looga diyaar garoobo geeddi-socodka caalamiga ah ee cimilada, gaar ahaan Shirka Qaramada Midoobay ee Isbeddelka Cimilada ee COP31, oo lagu qaban doono Türkiye bisha November.
In ka badan 100 dhallinyaro ah ayaa ka qaybgalay shirka, iyagoo ka wada hadlay saameynta isbeddelka cimilada, caqabadaha ay Soomaaliya wajahdo, tallaabooyinka lagu yareyn karo saameyntaas iyo xalalka ay dhallinyaradu hormuudka ka noqon karaan. Shirka ayaa sidoo kale diiradda lagu saarayaa diyaarinta talooyin iyo aragtiyo ay dhallinyarada Soomaaliyeed doonayaan in lagu gudbiyo geeddi-socodka COP31.
Masuuliyiin ka hadlay shirka ayaa xusay saameynta ballaaran ee isbeddelka cimiladu ku leeyahay bulshada Soomaaliyeed, gaar ahaan dhallinyarada iyo carruurta, kuwaas oo wajahaya abaaro, fatahaado, cunto yari iyo barakac.
LCOY-yada waxaa sannad kasta lagu qabtaa dalal badan oo caalamka ah, iyadoo dhallinyarada loo sameeyo madal ay kaga hadlaan mudnaanta cimilada, ku diyaariyaan talooyin iyo bayaanno, isla markaana ay uga qaybqaataan geeddi-socodka caalamiga ah ee cimilada ee ku wajahan COP.