Dhul go’o ka dhacay Koonfurta Itoobiya oo galaaftay nolosha ugu yaraan 70 qof

Itoobiya, 12 Maarso 2026 (Dawan)– Ugu yaraan 70 qof ayaa ku dhintay dhul go’o ka dhacay koonfurta Itoobiya, kadib roobab mahiigaan ah, sida ay mas’uuliyiinta gobolka u sheegeen maanta oo Khamiis ah, Warbaahinta Itoobiya (EBC).

Masiibadan ayaa ka dhacday deegaanka Degama, oo ka tirsan gobolka Gamo. Hailemariam Tesfaye, madaxa adeegga xiriirka dowladda ee gobolka, ayaa u sheegay weriyayaasha in tirada dhimashada ay kordhi karto, iyadoo kooxaha gurmadka iyo samatabbixintu ay weli dhex qodayaan burburka ka dhashay afar degmo oo ay saameysay masiibadu. “Khasaaraha ka dhashay roobabka mahiigaanka ah weli baaritaan ayaa ku socda,” ayuu yiri Hailemariam, isagoo xusay in masiibadani ay barakicisay in ka badan 3,480 muwaadin.

Magaalada u dhow ee Arba Minch, Webiga Kulfo ayaa ku fatahay hareerihiisa, taasoo gacan ka geysatay burburka ugu yaraan 190 guri.

Mas’uuliyiinta deegaanka ayaa hadda ku guda jira sidii dadka looga saari lahaa aagagga khatarta badan iyo soo saarista meydadka ku hoos jira dhulka go’ay.

Xukuumadda gobolka ayaa sheegtay inay bilowday qaybinta gargaarka bini’aadantinimo, isla markaana ka codsatay hay’adaha gargaarka ee gudaha iyo kuwa caalamiga ah inay bixiyaan taageero dhaqaale oo lagula tacaalo masiibadan.

Dhul go'oan ayaa ah khatar soo noqnoqota xilliyada roobabka ee Itoobiya, waxaana inta badan sii kiciya dhulka buuraleyda ah ee dhaadhaca leh iyo xaalufinta dhirta.