Jigjiga (Dawan)- Dowlad Deegaanka Soomaalida (DDS) ayaa 1,000 hektar oo dhul ah u qoondeeyay mashruuc lagu xoojinayo wax-soo-saarka beeraha iyo kaydinta raashinka.
Mashruuca ayaa ka socda degmooyinka Horoorays iyo Tulli Guuleed, iyadoo 750 hektar laga hirgelinayo Horoorays, halka 250 hektarna loo qoondeeyay degmada Tulli Guuleed.
Wasiirka Xafiiska Beeraha ee Dowlad Deegaanka Soomaalida, Cabdullaahi Maxamed Muuse, ayaa Sabtidii sheegay in wax-soo-saarka laga helo labada deegaan loogu talagalay in qayb ka mid ah lagu daro kaydka raashinka ee deegaanka, si loo helo raashin la isticmaali karo xilliyada uu yaraado wax-soo-saarka beeraha.
“Xafiiska Beeruhu degmooyinka Tulli Guuleed iyo Horoorays wuxuu ka wadaa in raashin laga soo saaro, kaas oo loogu talagalay inuu qayb ka noqdo raashinka kaydka ah,” ayuu yiri Wasiir Cabdullaahi.