Jigjiga (Dawan) – Dowlad Deegaanka Soomaalida ayaa sheegtay inay hal maalin gudaheed lagu beeray 2.652 milyan oo geed, kuwaas oo lagu beeray dhul dhan 1,060 hektar, iyadoo ololaha laga fuliyay dhammaan gobollada deegaanka.
Ololahan ayaa qayb ka ahaa Barnaamijka Dhaxal-reebka Cagaaran (Green Legacy Initiative) ee Itoobiya, kaas oo dowladda ku sheegtay mid lagu kordhinayo dhirta, lagu ilaalinayo deegaanka laguna yareynayo saameynta isbeddelka cimilada.
Munaasabadda ugu weyn ee ololaha ayaa ka dhacday magaalada Jigjiga, halkaas oo Madaxweyne Ku-xigeenka Dowlad Deegaanka Soomaalida, Ibraahim Cusmaan Faarax, uu hor kacayay beerista geedo laga fuliyay Xarunta Dhaqan-celinta ee Calaamudiin, isaga oo ay ku wehliyeen xubno ka tirsan golaha wasiirrada iyo masuuliyiin kale.
Masuuliyiinta ayaa sidoo kale kormeeray dib-u-habaynta ka socota xarunta, taas oo dowladdu sheegtay inay qayb ka tahay qorshe lagu beddelayo xarumaha asluubta si ay diiradda u saaraan waxbarashada, tababarka xirfadaha, dhaqan-celinta iyo dib-u-dhexgalka bulshada.
Gobollada iyo degmooyinka kale ee deegaanka ayaa si isku mar ah uga qayb qaatay ololaha.
Tuulada Ceel-goof ee degmada Mooyaale, Wasiir Ku-xigeenka Xafiiska Waraabka, Eng. Abubakar Daakir, iyo masuuliyiin kale ayaa ku beeray geedo ay bulshada deegaanka si weyn uga qayb qaadatay.
