Addis Ababa (Dawan) – Midowga Afrika ayaa ku dhawaaqay inuu qaban doono shir ay isugu imanayaan dalalka ay ciidamadu ka joogaan Soomaaliya, kaas oo diiradda lagu saari doono mustaqbalka hawlgalka amniga iyo xasillinta dalka.
Go’aankan ayaa ka soo baxay kulan heer wasiir ah oo ay yeesheen Golaha Nabadda iyo Amniga ee Midowga Afrika, kaas oo lagu qabtay Addis Ababa. Golaha ayaa faray Guddiga Midowga Afrika, iyagoo la tashanaya Dowladda Federaalka Soomaaliya, in la qabto shir ay ka qaybgalayaan Taliyeyaasha Guud ee Ciidamada dalalka ka qaybqaata hawlgalka AUSSOM.
Ujeeddada shirkan ayaa ah in laga arrinsado saddex ikhtiyaar oo la xiriira mustaqbalka hawlgalka AUSSOM, iyadoo si gaar ah diiradda loo saarayo joogtaynta howlgalka, ka hortagga firaaq amni, iyo xoojinta wada-shaqaynta dalalka ciidammada ka jooga Soomaaliya.
