Dowladda oo cambaareysay colaaddii Aricadeeye ee galaaftay nolosha 21 Qof

Muqdisho (Dawan) – Wasaaradda Arrimaha Gudaha, Federaalka iyo Dib-u-heshiisiinta Soomaaliya ayaa cambaareysay colaadihii ka dhacay deegaanka Aricadeeye ee Dowlad Goboleedka Woqooi Bari, kuwaas oo dhex maray laba beelood oo walaalo ah, isla markaana sababay dhimasho iyo dhaawac soo gaaray dad rayid ah.

Qoraal ay soo saartay Wasaaradda ayaa lagu sheegay in Dowladda Federaalka Soomaaliya ay si adag uga soo horjeeddo falalka gacan-ka-hadalka ah ee sababay khasaaraha naf iyo maal, iyadoo muujisay sida ay uga xun tahay dhimashada iyo dhaawacyada ka dhashay dagaallada.

Wasaaraddu waxay ku baaqday in si degdeg ah loo joojiyo colaadda, lana dardargeliyo dadaallada lagu xallinayo khilaafka, iyadoo dhinacyada ku lugta leh ugu baaqday inay mudnaanta siiyaan nabadda, wada hadalka iyo wada noolaanshaha bulshada.

“Waxaan si adag u cambaareyneynaa falalka gacan-ka-hadalka ah ee sababay dhimashada iyo dhaawaca dadka rayidka ah. Waxaan ugu baaqeynaa dhinacyada ku lugta leh colaadda inay si degdeg ah u joojiyaan dagaallada, ayna mudnaanta siiyaan nabadda, wada hadalka iyo wada noolaanshaha bulshada,” ayaa lagu yiri warsaxaafadeedka Wasaaradda Arrimaha Gudaha.

Sidoo kale, Wasaaradda ayaa ugu baaqday odayaasha dhaqanka, culimada, haweenka, dhallinyarada, waxgaradka deegaanka iyo mas’uuliyiinta Dowlad-goboleedka Waqooyi Bari inay qaataan door muuqda oo lagu dejinayo xiisadda, laguna xoojinayo wada hadalka si loo gaaro xal nabadeed oo waara, loogana hortago fiditaanka colaadda.

Bayaankan ayaa yimid kaddib markii shalay uu deegaanka Aricadeeye ka qarxay dagaal u dhexeeyay laba beelood oo wada dega halkaasi, kaas oo sababay dhimashada ugu yaraan 21 qof. Dadkaasi ayaa maanta janaaso wadareed lagula tukaday magaalada Laascaanood.