Muqdisho (Dawan)– Wasaaradda Waxbarashada, Hiddaha iyo Tacliinta Sare ee Xukuumadda Federaalka Soomaaliya ayaa Talaadadii si rasmi ah u dhagax-dhigtay dhismaha Iskuulka Jenaraal Daa’uud, kaas oo laga hirgelinayo degmada Yaaqshiid ee gobolka Banaadir. Iskuulkan cusub ayaa la filayaa inuu waxbarasho u fidiyo ilaa 2,400 oo arday, iyadoo la qorsheynayo in ardayda deegaanka ay ka faa’iideystaan fursad waxbarasho oo tayo leh.
Wasiirka Wasaaradda Waxbarashada, Hiddaha iyo Tacliinta Sare, Faarax Sheekh Cabdulqaadir, ayaa sheegay in iskuulkan uu qeyb ka yahay dadaallada dowladda ee dib loogu soo nooleynayo waxbarashada dalka, gaar ahaan bulshada ku nool Muqdisho. “Iskuulkan cusub wuxuu siinayaa ardayda deegaanka fursad ay ku helaan waxbarasho tayo leh, iyadoo aan wax kharash ah laga qaadi doonin,” ayuu yiri wasiirku.
Iskuulka Jenaraal Daa’uud, oo ka koobnaan doona 30 fasal, ayaa la filayaa inuu noqdo xarun waxbarasho oo muhiim u ah degmada Yaaqshiid. Xoghayaha Joogtada ee Wasaaradda Waxbarashada, Xasan Maxamed Cali, ayaa xaqiijiyay in iskuulkan uu awood u yeelan doono inuu bixiyo adeegyo waxbarasho oo dhammaystiran oo ay ka faa’iideysan karaan 2,400 oo arday.
Munaasabadda dhagax-dhigga, waxaa ka qeyb galay mas’uuliyiin ka tirsan dowladda, maamulka degmada, iyo bulshada deegaanka, kuwaas oo si weyn u soo dhaweeyay dhismaha iskuulkan cusub.
