Dowladda oo faahfaahin ka bixisay hawlgal dhul iyo cir ah oo lagu dilay in ka badan 20 AS ah

Muqdisho (Dawan) – Soomaaliya ayaa sheegtay in ugu yaraan 22 dagaallame oo ka tirsan Al-Shabaab lagu dilay hawlgal militari oo ka dhacay gobolka Shabeellaha Hoose, sida ay sheegtay Wasaaradda Gaashaandhigga maanta oo Arbaco ah.

Hawlgalka, oo socday 72-kii saac ee la soo dhaafay, ayaa ka dhacay deegaanka Buulo Cabdalla oo u dhexeeya Mubaarak iyo Ugunji, waxaana iska kaashaday Ciidanka Xoogga Dalka Soomaaliyeed iyo saaxiibbada caalamka, sida lagu sheegay bayaan ka soo baxay wasaaradda.

Weerarka ayaa isugu jiray dagaal toos ah oo dhulka ah iyo duqeymo cirka ah, sida bayaanka lagu sheegay.

Wasaaradda ayaa sheegtay in dadka la dilay uu ku jiro taliye lagu magacaabo Cabdiraxmaan Jeeri, oo lagu eedeeyay inuu ku lug lahaa falal ka dhan ah rayidka.

Wasaaradda Gaashaandhigga iyo Taliska Ciidanka Xoogga Dalka Soomaaliyeed ayaa ballanqaaday inay sii wadi doonaan hawlgallada noocan oo kale ah si loo wiiqo awoodda Al-Shabaab loona xoojiyo amniga dalka.

Sidoo kale, wasaaradda ayaa u mahadcelisay saaxiibbada caalamka taageerada ay siiyaan hawlgallada amniga.