Muqdisho (Dawan) – Wasaaradda Amniga Gudaha ee Dowladda Federaalka Soomaaliya ayaa ku eedeysay xubno ka tirsan mucaaradka siyaasadeed inay ku xadgudbeen habraacyada amniga iyo xeerarka gelitaanka Garoonka Diyaaradaha Caalamiga ah ee Aadan Cadde, gaar ahaan saacadaha dambe ee habeenkii.
War-saxaafadeed ay wasaaraddu soo saartay xalay ayaa lagu sheegay in xeerarka amniga garoonku si cad u mamnuucayaan gelitaanka aan oggolaansho haysan xilliyada habeenkii, iyadoo tallaabooyinkaas lagu sababeeyay sugidda ammaanka guud ee garoonka iyo badqabka rakaabka, shaqaalaha iyo hantida qaranka.
Wasaaradda ayaa sheegtay in dhacdooyin dhowaan ka dhacay garoonka ay muujinayaan in shaqsiyaad hore xilal u soo qabtay inay jebiyeen nidaamkaas, iyagoo isku dayay inay galaan garoonka iyaga oo aan raacin habraacyada rasmiga ah ee amniga.
“Wasaaradda Amniga Gudaha waxay mar kale caddeyneysaa in habraacyada amniga garoonku ay wada khuseeyaan dhammaan muwaadiniinta iyo masuuliyiinta, xil haya iyo kuwii horeba, isla markaana aan cidna laga reebayn fulinta nidaamkaas,” ayaa lagu yiri war-saxaafadeedka. Wasaaraddu waxay ku baaqday in dhammaan muwaadiniinta, gaar ahaan mas’uuliyiinta siyaasadeed, ay muujiyaan masuuliyad iyo ixtiraam buuxa oo ku wajahan sharciga.
