Dowladda Soomaaliya oo furtay Buundada Sabiib-Caanole kadib dib-u-dhiska

Soomaaliya, 6 December 2025 – Dowladda Federaalka Soomaaliya ayaa maanta si rasmi ah u furtay Buundada Sabiib-Canole ee gobolka Shabeellaha Hoose, taas oo horey u burburisay Al-Shabaab, ka hor inta aan ciidamada Soomaaliya iyo AUSSOM ay dib ula wareegin deegaanka bishii June 2025.

Buundadani waa mid ka mid ah buundooyin muhiim ah oo ka gudba Webiga Shabeelle, kuwaas oo ciidamada dowladda, iyagoo taageero ka helaya AUSSOM, ay ka qabsadeen kooxda.

Waxay isku xirtaa magaalooyinka istiraatiijiga ah oo shabelleha hoose ah , iyadoo fududeysa dhaq-dhaqaaqa dadka, xoolaha, iyo alaabooyinka beeraleyda, isla markaana isku xirka dhaqdhaaqa bulshooyinka deegaanka.

Buundadu waxay ku taallaa meel u dhow magaalada Afgoye, qiyaastii 35 km koonfur-galbeed ka xigta Muqdisho. Mas’uuliyiintu waxay sheegeen in Turkigu taageero weyn ka geystay dib-u-dhiska buundada.

“Walaalaheena Turkiga waxay ka qaateen door muuqda dib-u-dhiska buundadan, waxayna qayb ka tahay dadaalka joogtada ah ee lagu taageerayo shacabka. Buundada Sabiib iyo Caanoole waa halbowlaha dhaqdhaqaaqa beeraleyda deegaanka,” ayuu yiri Wasiirka Gaashaandhigga, Axmed Macallin Fiqi.

Wasiirka Arrimaha Gudaha, Cali Yuusuf Cali (Xoosh), ayaa sheegay in dib-u-furitaanka buundadu ay qayb ka tahay dadaallada xasillinta ee lagu sameynayo deegaanada lagala wareegay Al-Shabaab.

Munaasabadda daahfurka waxaa goob joog ka ahaa Wasiirka Gaashaandhigga Fiqi, Wasiirka Arrimaha Gudaha Xoosh, Taliyaha Ciidanka Dhulka ee Soomaaliya, Khaalid Maxamed Maxamed, Taliyaha Ciidamada AUSSOM Sam Kavuma, iyo wakiillo ka socday Safaaradda Turkiga.