Muqdisho (Dawan) – Wasiirka Gaashaandhigga Soomaaliya, Axmed Macallin Fiqi, ayaa qaar ka mid ah mucaaradka ku eedeeyay inay abaabulayaan maleeshiyaad, isla markaana ay adeegsanayaan sheegashada ah “waa la i soo weerarayaa” si ay marmarsiiyo ugu helaan arrintaas. Hadalka wasiirka ayaa imaanaya kaddib eedeymo ay mucaaradku dowladda u jeediyeen oo ku saabsan dhaqdhaqaaq ciidan oo lagu beegsanayo guryaha madaxda hore.
Qoraal uu ku baahiyay bartiisa Facebook, ayuu Fiqi ku sheegay in “shirqool la guntaday bilihii la soo dhaafay” uu hadda isu beddelay qorshe lagu doonayo abaabulka maleeshiyaad iyo abaabulka taageerayaal, kaddib markii, sida uu sheegay, la waayay marmarsiiyo kale oo lagu fuliyo qorshahaas.
Wasiir Fiqi ayaa sheegay in kooxo mucaarad ah oo uu ku tilmaamay “kuwa aaminsan in qoriga kursi lagu heli karo” ay hore saddex jeer isugu dayeen weerarro fashilmay, kuwaas oo uu sheegay in shisheeye maalgelinayeen.
“Ma dhicin marna in ciidanka dowladda uu weeraray ama gacanta la horreeyay; mar walba iyaga ayaa weerarka bilaabay,” ayuu yiri Fiqi, isaga oo mucaaradka ku eedeeyay inay maleeshiyaad ku ururiyeen guryahooda.
