Muqdisho (Dawan) – Dowladda Federaalka Soomaaliya ayaa ku dhawaaqday inay diyaarinayso weji cusub oo howlgallada militari ah oo ka dhan ah Al-Shabaab, iyadoo ujeeddadu tahay in la dardargeliyo dadaallada lagu xoreynayo deegaannada ay weli kooxdu kaga sugan tahay dalka.
Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa sheegay in dowladda ay ku jirto diyaarinta qorshe dhameystiran oo dhowaan shacabka Soomaaliyeed loo soo bandhigi doono, kaas oo saldhig u noqon doona guluf cusub oo ka dhan ah Al-Shabaab.
Isagoo ka hadlay munaasabad ka dhacday magaalada Muqdisho, oo lagu soo gabagabeeyay dabbaal degyada todobaadka maalmaha xornimada iyo midnimada, ayuu madaxweynuhu sheegay in wejiga cusub ee howlgallada uu daba socdo qorshe istaraatiiji ah oo dowladda ay waddo.
“Dowladda Soomaaliya qorshe cad ayay waddaa. Markuu soo dhammaadana dadka way u soo bandhigi doontaa, guluf kale oo ka dambeeya oo aan Shabaab dalka uga xoraynayno ayaan rabnaa inaan qaadno,” ayuu yiri Madaxweyne Xasan Sheekh.
Madaxweynuhu ma uusan shaacin waqtiga rasmiga ah ee la bilaabi doono gulufka cusub ama baaxadda uu yeelan doono, hase yeeshee wuxuu caddeeyay in dowladda ay sii wadi doonto dadaallada lagu ciribtirayo kooxda.
Hadalkan ayaa kusoo beegmaya xilli ciidamada dowladda, oo garabsanaya ciidamada deegaanka iyo saaxiibbada caalamiga ah, ay sii wadaan howlgallo ka dhan ah Al-Shabaab oo muddo ka badan 15 sano dagaal kula jirtay dowladda Federaalka Soomaaliya.
