Muqdisho (Dawan) – Duqa magaalada St. Louis Park ee gobolka Minnesota ee dalka Maraykanka, Naadiya Maxamed, ayaa maanta oo Jimco ah soo gaartay magaalada Muqdisho, iyadoo booqashadan ay noqotay tii ugu horreysay ee ay ku timaaddo Soomaaliya muddo toban sano ah.
Naadiya oo ka hadlaysay munaasabad soo dhoweyn ah oo loogu qabtay Muqdisho ayaa muujisay sida ay ugu faraxsan tahay dib ugu soo laabashada dalkeeda iyo la kulanka bulshada Soomaaliyeed.
“Waqti badan baa hadda ka soo wareegtay intii ugu dambaysay ee Muqdisho. Aad baan ugu faraxsanahay inaan waddankaygii ku soo laabto,” ayay tiri.
Waxay sheegtay in inta ay booqashada ku joogto Soomaaliya ay kulammo la yeelan doonto ardayda jaamacadaha, dhalinyarada iyo qaybaha kala duwan ee bulshada, iyadoo diiradda saari doonta xoojinta xiriirka u dhexeeya Soomaaliya iyo qurba-joogta Soomaaliyeed.
