Duqeyn ka dhacday agagaarka Baydhabo oo lagu dilay xubno ka tirsan AS

Muqdisho (Dawan) – Ugu yaraan 12 xubnood oo ka tirsan kooxda Al-Shabaab ayaa lagu dilay duqeyn aroornimadii maanta ka dhacday deegaanka Gasarta, oo u dhexeeya magaalooyinka Baydhabo iyo Daynuunaay ee gobolka Baay, sida ay sheegtay Wasaaradda Gaashaandhigga Soomaaliya.

Wasaaraddu waxay sheegtay in duqeynta ay fuliyeen Ciidanka Qaranka Soomaaliyeed oo kaashanaya saaxiibbada caalamka, iyadoo lagu beegsaday dagaalamayaal ka tirsan kooxda Al-Shabaab.

Qoraal kasoo baxay wasaaradda ayaa lagu yiri ;"Duqeymahan oo lagu beegsaday maleeshiyaad ka tirsan Khawaarijta Al-Shabaab ayaa lagu dilay 12 dhagarqabe, halka lagu dhaawacay tiro kale"

Sida ay wasaaraddu xustay, hawlgalladan ayaa qayb ka ah dadaallada joogtada ah ee lagu wiiqayo awoodda kooxda Al-Shabaab, laguna xaqiijinayo amniga deegaannada dalka.

Wasaaradda Gaashaandhigga ayaa sidoo kale sheegtay in ciidanka qaranka iyo saaxiibbada caalamka ay sii wadi doonaan hawlgallada noocan oo kale ah, si loo ciribtiro khatarta argagixisada loona xoojiyo nabadda iyo xasilloonida dalka.

Duqeyntan ayaa kusoo beegmeysa iyada oo madaxweynaha Soomaaliya, Xasan Sheekh Maxamuud uu ku suganyahay magaalada Baydhabo oo ay dhawaan la wareegeen ciidamada dowladda federaalka kaddib is casiliaaddii madaxweyinii hore ee Koonfur Galbeed Cabdicasiis Laftagreen oo ay is khilaafeen dowladda.