Soo raraya...
Maqaalka waa la soo dejinayaa...
Ankara (Dawan)– Madaxweynaha Turkiga Recep Tayyip Erdogan ayaa sheegay in go'aanka ay Israa’iil ugu aqoonsatay Somaliland inuu yahay mid ka mid ah tusaalooyinka muujinaya dadaallada sii kordhaya ee Tel Aviv ay ku doonayso inay ku qalqal-geliso xasilloonida gobolka.
Arrintan ayuu Madaxweyne Erdogan ka sheegay wadahadal taleefan oo uu Isniintii la yeeshay Dhaxal-sugaha Dowladda Kuwait, Sheekh Sabah Khalid Al-Hamad Al-Sabah, sida lagu sheegay war ka soo baxay Madaxtooyada Turkiga.
Maqaallo la xidhiidha
Intii uu socday wadahadalku, labada dhinac ayaa ka wada hadlay xiriirka laba geesoodka ah iyo arrimo dhowr ah oo heer gobol iyo caalami ah. Madaxweyne Erdogan ayaa si gaar ah u taabtay aqoonsiga Israa’iil ee Somaliland, isagoo carrabka ku adkeeyay in tallaabadaasi ay ka mid tahay isku dayo sii badanaya oo Israa’iil ku wiiqayso amniga iyo xasilloonida gobolka, isla markaana uu xusay muhiimadda ay leedahay taageeridda midnimada iyo wadajirka dhuleed ee Soomaaliya.
Jimcihii, Israa’iil ayaa ku dhawaaqday inay si rasmi ah u aqoonsatay Somaliland oo caalamku u aqoonsanyahay inay ka mid tahay Soomaaliya balse ay iyadu si iskeed ah ugu dhawaaqday inay ka go'day Soomaaliya sanadkii 1991-kii.
Kadib mowqifka Israa’iil, dowladda Soomaaliya ayaa mar kale ku celisay go’aankeeda adag ee ah ianysan wax gorgortan ah ka geleynin ilaalinta madaxbannaanida, midnimada qaran iyo wadajirka dhuleed ee dalka, iyadoo si cad u diidday tallaabada ay Israa’iil ku aqoonsatay gobollada waqooyi ee Soomaaliya, kuna tilmaantay mid sharci-darro ah.
