Addis Ababa (Dawan)— Madaxweynaha Turkiga Recep Tayyip Erdoğan ayaa sheegay in aqoonsiga Israa’iil inuusan wax faa’iido ah u keenayn Somaliland iyo guud ahaan Geeska Afrika, isaga oo ka digay in aan gobolka loo rogin goob ay ku loolamaan quwadaha shisheeye.
Hadalkan ayuu Erdoğan ka sheegay shir jaraa’id oo uu si wadajir ah ula qabtay Ra’iisul Wasaaraha Itoobiya Abiy Axmed magaalada Addis Ababa, halkaas oo uu booqasho ku tegay shalay . Wuxuu sidoo kale ku baaqay in dalalka gobolka ay iyagu u istaagaan xalinta dhibaatooyinkooda si looga fogaado faragelin dibadeed.
"Waxaan rabaa inaan mar kale ku celiyo in aqoonsiga ay Israel aqoonsatay Somaliland inuusan faa'iido u lahayn Somaliland iyo guud ahaan Geeska Afrika toona," ayuu Erdogan ka sheegay shirka jaraa'id.
Wuxuu sheegay in Türkiye ay muhiimad gaar ah siiso madax-bannaanida iyo midnimada dhuleed ee dalalka gobolka, isla markaana ay ka hortagayso khilaafyo cusub iyo dhibaatooyin ku soo kordha gobol ay horay ugu jireen qalalaase.
Erdogan wuxuu bogaadiyay Itoobiya iyo Soomaaliya sida ay uga qaybqaateen dadaalladdii dhex-dhexaadinta ee Ankara . “Marka xasiloonidu timaado, ma aragno wax caqabad ah oo ka hor istaagi karta Geeska Afrika inuu soo jiito fursadaha dhaqaale,” ayuu yiri.
