Antalya (Dawan)— Madaxweynaha Turkiga Recep Tayyip Erdoğan ayaa sheegay in uu socdo dhismaha saldhigga hawada sare ee Turkigu ka hirgelinayo Soomaaliya, isagoo sheegay in mashruucu qayb ka yahay dadaallada Ankara ay ku ballaarinayso awooddeeda helitaanka hawada sare.
Erdoğan oo ka hadlayay xafladda furitaanka Shirweynaha 77-aad ee Caalamiga ah ee Cir-bixinta (IAC) ee Antalya Isniintii, ayaa sheegay in Turkigu mashruuca saldhigga hawada sare uu Soomaaliya kala kaashanayo, isaga oo labada dal ku tilmaamay saaxiibbo iyo walaalo.
“Anagoo tixgelinayna xaaladda juqraafiyeed ee Turkiga, waxaan aasaas u dhigaynaa iskaashi taariikhi ah oo dhinaca hawada sare ah oo aan la leenahay Soomaaliya oo ah dal saaxiib iyo walaal,” ayuu yiri Erdoğan.
Wuxuu sheegay in la bilaabay shaqada dhismaha saldhigga hawada sare, isla markaana Turkigu si joogto ah uga shaqeynayo hirgelinta mashruuca oo uu ku tilmaamay mid istiraatiiji ah. Erdoğan ayaa sheegay in mashruucu uu xoojin doono awoodda Turkiga ee helitaanka hawada sare, isla markaana uu gacan ka geysan doono horumarinta nidaamka hawada sare ee qaaradda Afrika.
