Ankara (Dawan) – Wasaaradda Arrimaha Dibedda ee Turkiga ayaa si adag u cambaareysay go’aanka Israa’iil ee aqoonsiga Somaliland, iyadoo tallaabadan ku tilmaamtay faragelin toos ah oo ku saabsan arrimaha gudaha Soomaaliya iyo halis gelinaysa xasilloonida gobolka iyo caalamka.
War-saxaafadeed ka soo baxay wasaaradda ayaa lagu sheegay in aqoonsiga Israa’iil uu yahay tusaale kale oo ka mid ah tallaabooyinka sharci-darrada ah ee ay qaaday xukuumadda Netanyahu, isla markaana uu qayb ka yahay siyaasado sababa xasillooni darro joogto ah oo gobolka ka jirta.
“Aqoonsiga Israa’iil ee madax-bannaanida Somaliland wuxuu tusaale u yahay tallaabooyin sharci-darro ah oo ka dhan ah siyaasadaha dowladda Netanyahu, kuwaasoo abuuraya xasillooni darro heer gobol iyo caalami ah,” ayaa lagu yiri bayaanka.
Turkiga ayaa sidoo kale xusay in go’aamada la xiriira mustaqbalka Soomaaliya iyo Somaliland ay tahay in lagu gaaro hab waafaqsan doonista shacabka Soomaaliyeed, sida uu dhigayo sharciga caalamiga ah, iyadoo la ixtiraamayo midnimada iyo madax-bannaanida Jamhuuriyadda Federaalka Soomaaliya.
