Farmaajo oo ciidamada uga digay fulinta amar “ka baxsan Dastuurka”

Muqdisho (Dawan) – Madaxweynihii hore ee Soomaaliya Maxamed Cabdullaahi Maxamed “Farmaajo” ayaa ciidamada ammaanka Soomaaliya uga digay fulinta amarro uu ku tilmaamay kuwo ka baxsan dastuurka, isagoo ugu baaqay inay ilaaliyaan shacabka iyo xasilloonida dalka xilli ay sii kordhayaan xiisadaha siyaasadeed ee Muqdisho.

War-saxaafadeed uu Farmaajo soo saaray caawa oo Sabti ah ayuu si toos ah farriin ugu diray ciidamada ammaanka, isagoo xusay in waajibaadkoodu yahay ilaalinta badqabka iyo karaamada shacabka Soomaaliyeed, halkii ay ka fulin lahaayeen amarro wax u dhimaya xuquuqda muwaadiniinta.

“Waajibaadka saaran saraakiisha ammaanka waa ilaalinta badqabka iyo karaamada shacabka Soomaaliyeed,” ayuu yiri Farmaajo.

Madaxweynihii hore ayaa sidoo kale ciidamada uga digay inay fuliyaan amarro ka hor imaanaya dastuurka iyo shuruucda dalka.

“Waxaan ku adkaynayaa ciidamada inay ka taxaddaraan fulinta amarro hal dhinac ah oo aan waafaqsanayn dastuurka iyo shuruucda dalka, kuwaas oo horseedi kara isku dhac, qalalaase iyo khatar weyn oo ku timaadda dalka iyo sumcadda hay’adaha ammaanka,” ayuu yiri Farmaajo.

Farmaajo ayaa cambaareeyay waxa uu ku tilmaamay tallaabooyinka dowladda ee lagu caburinayo bannaanbaxyada ka socda Muqdisho, isagoo sheegay in bannaanbaxyadaasi ay yihiin kuwo nabadeed oo muujinaya cabashooyinka shacabka.

“Waxaan codkayga ku biirinayaa baaqyada masuuliyiinta Soomaaliyeed ee ku aaddan in dowladda Madaxweyne Xasan Sheekh, oo muddo xileedkeedu gabaabsi yahay, ayna ka fogaato tallaabo kasta oo lagu caburinayo muwaadiniinta Soomaaliyeed ee dibadbaxyada nabadeed ku muujinaya dhibaatada ay kala kulmeen hoggaamintiisa,” ayuu yiri Farmaajo.

Hadalkan ayaa kusoo aadaya iyadoo magaalada Muqdisho ay ka jiraan abaabulo siyaasadeed iyo bannaanbaxyo ay mucaaradku ku baaqeen, kuwaas oo la xiriira khilaafaadka siyaasadeed iyo doodaha ka taagan xaaladda dalka.