Muqdisho (Dawan) – Madaxweynihii hore ee Soomaaliya, Maxamed Cabdullaahi Farmaajo, ayaa Madaxweyne Xasan Sheekh Maxamuud ugu baaqay inuu hormuud ka noqdo wada-xaajood qaran oo heshiis laga gaaro hannaanka doorashooyinka, isla markaana muddo kooban lagu qabto doorasho loo dhan yahay.
Farmaajo ayaa saddexdan qodob ku soo bandhigay warqad furan oo uu u diray Madaxweyne Xasan Sheekh, isaga oo sheegay in Soomaaliya ay ku jirto marxalado siyaasadeed, amni, dhaqaale iyo bulsho oo xasaasi ah.
Tallaabada koowaad, Farmaajo wuxuu ku baaqay in la bilaabo wada-xaajood qaran oo ku dhisan tanaasul dhab ah. Wuxuu sheegay in wadahadal ay Soomaalidu hoggaaminayso uu muhiim u yahay ka hortagga faragelin shisheeye iyo go’aanno dibadda looga gaaro arrimaha dalka.
Tallaabada labaad, wuxuu soo jeediyay in dhinacyada siyaasadda ay heshiis ka gaaraan hannaanka doorashooyinka. Farmaajo wuxuu ku dooday in heshiis siyaasadeed oo laga gaaro doorashada uu saldhig u yahay sii socoshada dowlad sharciyad leh iyo qabsoomidda doorasho ay dhinacyadu wada oggol yihiin.
Tallaabada saddexaad, madaxweynihii hore wuxuu dalbaday in muddo kooban lagu qabto doorasho loo dhan yahay, si dalka looga saaro hubanti la’aanta siyaasadeed. Wuxuu ka digay in hay’ado uu sheegay inuu muddo-xileedkoodu dhammaaday ay xukunka sii joogaan, taas oo sida uu hadalka u dhigay halis ku noqon karta dowladnimada Soomaaliya.
