Zürich (Dawan)- Hay’adda kubadda cagta adduunka ee FIFA ayaa isbedel ku samaaeyay xeerarkeeda anshaxa ka hor Koobka Adduunka 2026, iyadoo xaqiijisay in ganaaxyada yaryar ee ciyaartoydu qaataan intii lagu jiray isreeb-reebka aysan si toos ah ugu gudbi doonin tartanka laftiisa.
Isbeddelkan cusub ayaa durba saameyn ku yeeshay ciyaartoy caan ah oo ay ka mid yihiin Nicolás Otamendi iyo Moisés Caicedo, kuwaas oo hadda loo oggolaaday inay ciyaaraan kulamada furitaanka dalalkooda ee Koobka Adduunka 2026.
Go’aankan ayaa muujinaya isbeddel weyn oo ku yimid habka FIFA u maareyso ganaaxyada ciyaartoyda, waxaana si weyn looga hadal hayaa caalamka kubadda cagta, gaar ahaan dalalka isu diyaarinaya tartanka cusub ee 48-ka xul qaran oo lagu qaban doono dalalka Mareykanka, Canada iyo Mexico.
Xeerarkii hore ayaa dhigayay in kaararka jaallaha ah ama ganaaxyada qaarkood ee laga qaato isreeb-reebka ay u gudbi karaan wareegga kama dambaysta ah ee Koobka Adduunka, taasoo keeni jirtay in ciyaartoy muhiim ah ay seegaan kulamada ugu horreeya tartanka sababo la xiriira dhacdooyin dhacay bilo kahor.
Sida ku cad xeerarka cusub, kaliya falalka culus sida rabshadaha, cunsuriyadda ama jebinta weyn ee anshaxa ayaa weli horseedi kara ganaaxyo lagu sii wado tartanka Koobka Adduunka 2026.
