Dara Salaam (Dawan) – Xulka Qaranka Gabdhaha Soomaaliya ee da'doodu ka yar tahay 17 sano ayaa guul taariikhi ah ka gaaray dhiggooda Suudaan, kaddib markii ay 8–2 ku garaaceen kulankoodii ugu dambeeyay ee Group A ee Tartanka Gabdhaha U-17 ee CECAFA 2026, kaas oo ka socda magaalada Dara Salaam ee dalka Tanzania.
Guushan ayaa noqotay tii ugu horreysay ee xul qaran oo gabdho Soomaaliyeed ah ka gaaro tartan rasmi ah oo heer caalami ah, taasoo calaamad u ah horumarka ay sameynayso kubadda cagta haweenka Soomaaliya.
Soomaaliya ayaa tartanka ku bilaabatay guuldarro 4–0 ah oo ay kala kulantay xulka martigelinaya tartanka ee Tanzania. Kulankeedii labaadna waxaa 6–0 uga adkaaday xulka Kenya, oo ka mid ah xulalka ugu xooggan tartanka, taasoo hoos u dhigtay rajadii ay Soomaaliya ka lahayd u gudbidda wareegga xiga.
