Gabdho lagu eedeyay taageerada xuska Somaliland oo lagu xiray Laascaanood

Laascaanood (Dawan) – Taliska Qaybta Booliska Gobolka Sool ee Maamulka Waqooyi Bari ayaa sheegay inay xabsiga dhigeen laba gabdhood oo lagu eedeeyay inay taageero u muujiyeen xuska 18-ka May ee Somaliland.

Bayaan kasoo baxay Booliska ayaa lagu sheegay in ciidamada ay gacanta kusoo dhigeen Salma Jaamac Yuusuf Axmed oo 18 jir ah iyo Faadumo Yuusuf Axmed Geelle oo 27 jir ah.

Ciidamada ayaa sheegay in labada gabdhood lagu eedeeyay inay baraha bulshada ku baahiyeen muuqaalo lagu taageerayo xuska 18-ka May, oo ah maalinta ay Somaliland u dabaaldegto ku dhawaaqistii madax-bannaanideeda.

Booliska ayaa sidoo kale sheegay inay raadinayaan gabar kale oo lagu magacaabo Sihaam, taas oo sida ay sheegeen inay ka qeyb qaadatay taabeerada xuskaasi.

Laamaha ammaanka ee maamulka Waqooyi Bari ayaa sheegay in taageero loo muujiyo Somaliland ay tahay arrin denbi ah, isla markaana tallaabo sharci ah laga qaadi doono cid kasta oo lagu helo falalkaas.

Laascaanood iyo inta badan gobolka Sool ayaa sanadihii lasoo dhaafay ahaa goob ay ka jireen muranno siyaasadeed iyo kuwo amni oo u dhexeeya Somaliland iyo dadka gobolka taas oo ugu dambeyn dhalisay inay ku dhawaaqaan ka bixidda Smaliland.

Somaliland ayaa maamuleysay magaalada Laascaanood muddo ku dhow 15 sano, balse ciidamada Somaliland ayaa magaalada laga saaray dagaallo dhacay bishii August 2023.

Maamulka Waqooyi Bari ayaa markii dambe looga dhawaaqay deegaannada Sool, Sanaag iyo Togdheer, waxaana si rasmi ah u aqoonsaday Dowladda Federaalka Soomaaliya, isagoo noqday maamulka ugu dambeeyay ee ku biira nidaamka Federaalka Soomaaliya.