Dhuusamareeb, 20 Maarso (Dawan )– Madaxweyne ku-xigeenka Dowlad Goboleedka Galmudug, Cali Daahir Ciid, ayaa Jimcihii soo jeediyay in maamulka uu dhexdhexaadiyo khilaafka u dhexeeya Dowladda Federaalka Soomaaliya iyo Dowlad Goboleedka Koonfur Galbeed, isagoo ku baaqay in labada dhinac ay ku soo laabtaan wadahadalka.
Isagoo ka hadlayay magaalada Dhuusamareeb kadib Salaadda Ciidul Fidriga, ayuu Cali Daahir Ciid sheegay in Galmudug ay diyaar u tahay inay martigeliso wadahadallo lagu xallinayo khilaafka u dhexeeya Muqdisho iyo Baydhabo, kaas oo sii xoogeystay maalmihii u dambeeyay.
“ Annaga Galmudug ahaan gogol baan dhigaynaa diyaar baan u nahay hawlaha ka taagan muqdisho iyo Baydhabo in aan xalino ,” ayuu yiri, isagoo intaas ku daray in wadahadallada lagu qaban karo magaalooyinka Gaalkacyo ama Dhuusamareeb midii loo baahdo.
Madaxweyne ku-xigeenka ayaa ugu baaqay labada dhinac inay mudnaanta siiyaan midnimada dalka, isla markaana ay ka fogaadaan tallaabo kasta oo sii hurin karta xiisadda, isagoo ka digay in khilaafaadka siyaasadeed ee sii socda ay wiiqi karaan xasilloonida iyo horumarka dalka.
Wuxuu sidoo kale ugu baaqay odayaasha dhaqanka, culimada iyo siyaasiyiinta inay ka qeyb qaataan dadaallada dib-u-heshiisiinta iyo xalinta khilaafaadka si nabad ah.