Muqdisho (Dawan) – Hay’adda Maareynta Musiibooyinka Soomaaliyeed (SoDMA) ayaa gargaar cunto oo degdeg ah gaarsiisay qoysaska nugul ee ay abaartu saameysay ee ku nool degmooyinka Afgooye ee gobolka Shabeellaha Hoose iyo Xarardheere ee gobolka Mudug, iyadoo gurmadkan uu qeyb ka yahay dadaallada lagu yareynayo saameynta abaarta daba dheeraatay.
Hay’addu waxay sheegtay in qaybinta gargaarku ay ka tirsan tahay barnaamijka gurmadka bani’aadamnimo ee SoDMA, kaas oo lagu taageerayo bulshada wajahaysa cunto-yaraan iyo dhibaatooyinka ka dhashay abaarta muddada dheer socotay.
Guddoomiyaha Hay’adda Maareynta Musiibooyinka Soomaaliyeed (SoDMA), Maxamuud Macallin Cabdulle, ayaa sheegay in gargaarkani uu qeyb ka yahay dadaallada joogtada ah ee hay’addu ku gaarsiineyso taageero bulshada ay saameeyeen abaarta iyo xaaladaha bani’aadamnimo.
“Gargaarkan wuxuu qayb ka yahay dadaalladeenna aan ku gaarsiineyno bulshada ay abaartu iyo xaaladaha bani’aadamnimo saameeyeen. Waxaan sii wadi doonnaa inaan hubinno in qoysaska nugul ay helaan taageerada ay u baahan yihiin,” ayuu yiri Guddoomiyuhu.