Muqdisho (Dawan) — Jabuuti ayaa 16-ka iyo 17-ka Diseembar 2026 martigelin doonta shirweynaha labaad ee Wargeysyada Rasmiga ah ee Afrika (FAJO), kaas oo looga gol leeyahay dhismaha shabakad joogto ah oo isku xirta hay’adaha qaabilsan daabacaadda sharciyada iyo go’aannada rasmiga ah ee dalalka qaaradda, sida ay sheegtay Wakaaladda Wararka Jabuuti (ADI).
Shirka oo lagu qabanayo magaca Madaxweynaha Jabuuti, Ismaaciil Cumar Geelle, ayaa waxaa qabanqaabinaya Xoghaynta Guud ee Dowladda Jabuuti. Waxa uu daba socdaa shirweynihii ugu horreeyay ee la qabtay sannadkii 2025. Sida ay sheegtay Wakaaladda Wararka Jabuuti, waxaa la filayaa in shirka lagu saxiixo axdi iskaashi, laguna ansixiyo Baaqa Jabuuti, sidoo kalena lagu dhiso xoghayn joogto ah oo isku dubbaridi doonta hawlaha, dabagalka heshiisyada iyo xiriirka dalalka xubnaha ka ah shabakadda.
Shirka ayaa sidoo kale diiradda lagu saari doonaa mideynta heerarka daabacaadda sharciyada, isku xirka nidaamyada dijitaalka ah, amniga internetka, kaydinta elektaroonigga ah iyo adeegsiga garaadka macmalka ah.