Muqdisho (Dawan ) – Guddiga Madaxa-bannaan ee Doorashooyinka Qaranka iyo Soohdimaha ayaa Gobolka Gedo ku daray jadwalka doorashooyinka dowlad-goboleedyada iyo maamullada dalka ee 2026, taas oo ah tallaabo muujineysa in gobolkaas lagu daray qorshaha doorashooyinka ee uu guddigu shaaciyay.
Sida ku cad jadwalka uu guddigu soo saaray maanta, doorashada Golaha Deegaanka ee Gedo ee dowlad goboleedka Jubbaland ayaa loo asteeyay 30-ka July 2026, taas oo ka dhigeysa mid ka mid ah doorashooyinka la qorsheeyay in la qabto 2026, xilli ay jiraan khilaafaad siyaasadeed oo u dhexeeya dowladda federaalka iyo Jubbaland.
Sida ku cad jadwalka, doorashooyinka Koonfur Galbeed ayaa bilaabanaya 10-ka May 2026, iyadoo la dooranayo Golaha Deegaanka iyo Golaha Wakiillada. Doorashada Guddoonka Golaha Wakiillada ayaa dhici doonta 18-ka May, halka doorashada madaxtinimada loo asteeyay 23-ka May 2026.
Guddiga ayaa sidoo kale sheegay in doorashooyinka Hirshabeelle iyo Galmudug ay isku jadwal yihiin. Labada dowlad-goboleed ayaa 20-ka June 2026 dooran doona Golaha Deegaanka iyo Golaha Wakiillada, halka 2-da July la dooran doono Guddoonka Golaha Wakiillada. Doorashada madaxtinimada ayaa loo muddeeyay 9-ka July 2026.