Geelle oo dekedaha ku tilmaamay tiirka ugu muhiimsan ganacsiga dalka

Jabuuti (Dawan) – Madaxweynaha Jamhuuriyadda Jabuuti, Ismaaciil Cumar Geelle, ayaa sheegay in dekedaha dalka iyo aagagga ganacsiga xorta ah ay yihiin tiirka ugu muhiimsan ee kobcinta ganacsiga iyo horumarinta dhaqaalaha Jabuuti, isaga oo adkeeyay doorkooda ku aaddan isku xirka ganacsiga gobolka iyo kan caalamka.

Madaxweyne Geelle ayaa hadalkan ka sheegay shirweynaha caalamiga ah ee Intermodal Africa 2026 oo ka socda Jabuuti, kaas oo diiradda lagu saarayo dekedaha, saadka iyo aagagga ganacsiga xorta ah.

Waxa uu xusay in dekedaha Doraleh, Damerjog, Tadjourah iyo Ghoubet, oo ay weheliyaan aagag ganacsi oo casri ah, ay dhiseen nidaam isku-dhafan oo ka jawaabaya baahiyaha sii kordhaya ee gaadiidka badda, isu-socodka ganacsiga gobolka iyo silsiladaha saadka ee caalamka.

Sidoo kale, Madaxweynaha ayaa tilmaamay in Jabuuti ay ka gudubtay doorkii deked kaliya, isla markaana ay hiigsanayso inay noqoto xarun istiraatiiji ah oo isku xirta ganacsiga, tamarta iyo isgaarsiinta, si ay uga jawaabto tartanka iyo isbeddellada dhaqaale ee caalamka.