Geelle oo ugu baaqay ganacsatada inay isbahaysi xoogan la yeeshaan dowladda

Jabuuti (Dawan) – Madaxweynaha Jabuuti, Ismaaciil Cumar Geelle, ayaa ugu baaqay ganacsatada dalka inay sameeyaan isbahaysi dhow oo ay la yeeshaan dowladda, iyadoo ay maalmo kooban ka harsan yihiin doorashada madaxtinimada ee la qorsheeyay 10-ka Abriil.

Geelle, oo sidoo kale ah musharraxa xisbiga UMP, ayaa hadalkan ka jeediyay kulan olole oo ka dhacay Hoteelka Ayla, halkaas oo uu kula hadlay ganacsato iyo madax ka tirsan Rugta Ganacsiga, isagoo xusay in xoojinta iskaashiga u dhexeeya dowladda iyo ganacsiga gaarka loo leeyahay ay muhiim u tahay la tacaalidda caqabadaha dhaqaale ee ka dhalan kara xaaladaha gobolka iyo kuwa caalamiga ah.

Madaxweynaha ayaa tilmaamay in dhaqaalaha Jabuuti uu ku taagan yahay saldhig adag, isagoo xusay koboc joogto ah, maalgashi muhiim ah iyo xasillooni dhaqaale oo ka dhigaysa dalka meel lagu kalsoon yahay.

Si kastaba ha ahaatee, Geelle ayaa ka digay in xiisadaha juqraafiyeed, oo ay ku jiraan khilaafaadka gobolka, ay saameyn karaan silsiladaha sahayda iyo qiimaha tamarta, taasoo saameyn ku yeelan karta maalgashiga iyo dhaqaalaha guud.

“In la iska indho tiro khatarahaasi waa qalad, halka in la iska dhiibo ay tahay dayacaad,” ayuu yiri, isagoo ku baaqay tallaabo wadajir ah oo ay qaadaan dowladda iyo shirkadaha. Geelle ayaa sidoo kale soo jeediyay in la xoojiyo iskaashiga dowlad iyo ganacsi si loo ilaaliyo sahayda muhiimka ah loona taageero wax-soo-saarka gudaha, isagoo ka digay dhaqan kasta oo ku saleysan mala-awaal suuqa, isla markaana ballanqaaday tallaabooyin lagu xakameynayo sicir-bararka si loo ilaaliyo awoodda wax iibsiga shacabka.

Iyadoo doorashadu soo dhowdahay, madaxweynaha ayaa sheegay in qorshihiisa siyaasadeed uu ku saleysan yahay “isbahaysi” uu la yeesho ganacsiga gaarka loo leeyahay, halkii uu ka soo bandhigi lahaa ballanqaadyo fara badan, isagoo ugu baaqay in la xoojiyo guulaha la gaaray lana dhiso dhaqaale adkeysi leh oo caddaalad ku dhisan.