Geelle oo ugu hambalyeeyay dhiggiisa Côte d’Ivoire Maalinta Qaranka

Jabuuti (Dawan)- Madaxweynaha Jabuuti, Ismaaciil Cumar Geelle, ayaa Jimcihii ugu hambalyeeyay Madaxweynaha Côte d’Ivoire, Alassane Ouattara, munaasabadda Maalinta Qaranka dalkaasi, isagoo dib u xaqiijiyay sida ay uga go’an tahay xoojinta xiriirka labada dal.

Farriin uu u diray Madaxweyne Ouattara, Madaxweyne Geelle ayaa lagu sheegay in dowladda iyo shacabka Jabuuti ay muujinayan taageerada ay u hayaan shacabka Côte d’Ivoire, sida ay sheegtay Wakaaladda Wararka Jabuuti ee ADI.

Geelle ayaa sidoo kale u rajeeyay in Côte d’Ivoire ay gaarto horumar, koboc dhaqaale iyo barwaaqo dheeraad ah, isagoo sheegay inuu ku faraxsan yahay waxa uu ku tilmaamay xoojinta joogtada ah ee xiriirka u dhexeeya Jabuuti iyo Côte d’Ivoire.

“Waxaad ku kalsoonaan kartaa go’aankeenna ah inaan mar walba ka shaqeyno xoojinta xiriirka mudnaanta leh ee horey uga dhexeeyay labadeenna dal,” ayuu Geelle ku yiri farriintiisa, sida ay sheegtay ADI.

Côte d’Ivoire waxay xornimada ka qaadatay Faransiiska 7-dii Agoosto 1960, xilligaas oo madaxweynihii ugu horreeyay ee dalka, Félix Houphouët-Boigny, uu ku dhawaaqay madaxbannaanida dalka. Côte d’Ivoire waxay Qaramada Midoobay ku biirtay 20-kii Sebtembar 1960.