Nairobi (Dawan)- Maxkamadda Sare ee Kenya ayaa si ku-meelgaar ah u hakisay qorshe muran badan dhaliyay oo la xiriiray xarun karantiil oo loogu talagalay cudurka Ebola, taas oo ay dowladda Mareykanku ku lug leedahay, isla markaana dhalisay dood xooggan oo ku saabsan amniga caafimaad ee Kenya.
Maxkamadda ayaa soo saartay amar ku-meelgaar ah oo ka mamnuucaya dowladda Kenya inay qaabisho ama dejiso dad looga shakisan yahay ama uu ku dhacay fayraska Ebola, ilaa laga gaarayo go’aan kama dambeys ah oo ku saabsan dacwad rasmi ah oo arrintan la xiriirta.
Garsoore Patricia Nyaundi ayaa soo saartay amarka kadib cabasho ay gudbisay hay’adda Katiba Institute, taas oo ku doodday in heshiiska Kenya iyo Mareykanka uu jebin karo dastuurka dalka, gaar ahaan qodobada la xiriira xuquuqda caafimaadka, ka qaybgalka shacabka iyo kormeerka baarlamaanka.
Go’aanka maxkamadda ayaa yimid hal maalin kadib markii saraakiil Mareykan ah ay xaqiijiyeen in Kenya ay oggolaatay qorshe lagu dhisayo xarun leh 50 sariirood oo ku taalla saldhigga ciidamada cirka ee Laikipia Air Base. Xaruntan ayaa loo qorsheeyay in lagu karantiilo muwaadiniinta Mareykanka ee laga yaabo inay qaadeen cudurka Ebola ee ka dillaacay Jamhuuriyadda Dimuqraadiga Congo.
