Muqdisho (Dawan) — Maamulka gobolka Banaadir ayaa diyaariyey ku dhawaad 3,000 mutadawiciin ah oo heegan ugu jira howlaha gurmadka, iyadoo maamulka uu sheegay inuu diyaarinayo qorshe looga jawaabayo fatahaadaha laga cabsi qabo inay ka dhashaan xaaladda El Niño.
Afhayeenka maamulka gobolka Banaadir, Saalax Xasan Cumar, ayaa Isniintii sheegay in guddiga heer gobol ee gurmadka iyo ka jawaabista uu diyaariyey ku dhawaad 3,000 mutadawiciin ah oo diyaar u ah inay ka qayb qaataan howlaha gurmadka.
Guddiga Gurmadka iyo Ka Jawaabista Fatahaadaha Deyrta iyo xaaladaha ka dhasha El Niño ayaa kulan ku yeeshay xarunta dhexe ee maamulka gobolka Banaadir. Kulanka waxaa guddoomiyay Guddoomiye ku-xigeenka Amniga iyo Siyaasadda ee gobolka Banaadir, Maxamed Axmed Diiriye (Yabooh).
Kulanka ayaa lagu soo bandhigay qorshayaasha mudnaanta u leh guddiga iyo warbixin hordhac ah oo ku saabsan howlaha la qabtay, iyadoo si gaar ah looga hadlay khataraha fatahaadaha iyo habka looga jawaabi karo xaaladaha degdegga ah.
